高比·拜仁的生平

黃衛豪

高比拜仁（Kobe Bean Bryant，1978年8月23號—）暱稱做高比仔，響美國賓州費城出世，係一個現役嘅NBA球員，由1996年加入NBA開始一路喺洛杉磯湖人打波，佢嘅波衫冧巴係24號（最初有一段長時間係8號），位置係得分後衛（Shooting Guard）。佢被認為係近年表現最好嘅NBA球員之一。高比拜仁係前費城76人嘅籃球員祖拜仁（Joe "Jellybean" Bryant）個仔。

高比拜仁係祖拜仁唯一嘅仔。高比話，佢4歲已經識打籃球。6歲時，佢哋一家移居意大利，而佢阿爸亦開始佢嘅職業籃球生涯。高比逐漸適應意大利嘅生活方式，並且能夠講一口流利嘅意大利話，更曾經認為意大利係佢第二個家。




1991年，高比一家搬返美國。喺費城郊區嘅勞爾梅里恩（Lower Merion）高中度過一段極之美妙嘅高中籃球生涯。呢段期間，高比成日去天普大學體育館打波，因此識得天普大學嘅球星、後來成為隊友嘅鍾斯（Eddie Jones）。當時嘅高比球技已經好突出，1994-95年高三年級嘅賽季，佢更以31.1分、10.4籃板、5.2助攻嘅成績，成為當年賓夕凡尼亞州年度最佳球員。喺呢一年，佢亦帶領球隊打出32勝3負佳績，攞到42年來第一個州冠軍，佢喺高中球季累積嘅2883分，更打破名宿張伯倫（Wilt Chamberlain）保持咗40年嘅紀錄。高比不可思議嘅籃球天分亦得到全美國認可。
佢喺美國大學入學試（SAT）中1080分嘅成績本來可以保證佢擁有好多一流大學──包括北卡羅萊納大學或杜克大學嘅籃球獎學金，但係，高比最終放棄佢原來嘅計劃，繞過大學籃壇直接進入NBA。作為歷史上第一個噉做嘅後衛，高比呢個大膽決定喺當時亦引起廣泛爭議。


網址來源:http://zh-yue.wikipedia.org/wiki/%E9%AB%98%E6%AF%94%E6%8B%9C%E4%BB%81

圖片來源:http://upload.wikimedia.org/wikipedia/commons/8/8a/NikeTaipeiFlagshipStoreLaunch_KobeBryant.jpg